《最美好的旅程》
黎左紐西蘭南島兩個幾星期，大約有一個星期係陰天。前兩日本身好想發晦氣文，因為我真心好鐘意Kaikuora，偏偏黎果日同走果日就好好天，中間果日就全日陰天，重搞到無得出海睇海豚海獅同鯨魚。想臨時留多一日，又因為我已經book 曬跟住落黎既住宿，加上NZ依家peak season 最後都係無辨法。
不過世事就係禁，搭巴士中途經過Picton 入左間精品店，見到一句神來之筆"don't let something you can't control destroy your journey" 你又岩喎，或者有時我地只係需要有個人提下自己。
唔知你地有無試過對一個地方一見鍾情，或者無乜特別原因，但總覺得連吸啖氣都係甜既。但有時你鐘意佢，又唔代表佢要對返你好，毫不客氣連落幾日雨但你都總係係心入面留左個位比佢。有時你路過一個閃閃發光既城市，雖然陽光普照但就係點都比唔到果種感覺你。然而到左最後，你發現你好似無真正開心過。
其實有時我地需要練習流浪，練習隨遇而安。天氣不似預期。如果你係佢最閃耀既時候遇見果個完美既佢，請你好好珍惜。如果你係佢未準備好既時候遇見佢，請感激呢場等待令你成長。最好既旅程從來唔係人地口中同你講果度有幾靚，只有你親身走過既晴天陰天雨天，先會係最好既旅程。
新一年，繼續活在當下。
(Dunedin, New Zealand)
Search